చాలా రోజులుగా సోషల్‌ మీడియా వేదికగా వివాదాస్పద వ్యాఖ్యలు చేస్తూ, అడిగితే.. అది తన భావ ప్రకటన స్వేచ్ఛ అని సమర్థించుకుంటున్నకత్తి మహేశ్‌పై తెలంగాణ పోలీస్‌ శాఖ గట్టి చర్యలు తీసుకుంది. కత్తి మహేశ్‌పై 6 నెలల పాటు నగర బహిష్కరణ విధిస్తున్నట్టు తెలంగాణ డీజీపీ మహేందర్‌ రెడ్డి అధికారికంగా ప్రకటించారు. ఈ 6నెలల్లో పోలీసుల అనుమతి లేకుండా నగరంలో ప్రవేశిస్తే అరెస్ట్‌ చేస్తామని, మూడేళ్ల జైలు శిక్ష పడే అవకాశం కూడా ఉందన్నారు. కత్తి మహేశ్‌ బహిష్కరణ నగరానికా? తెలంగాణ మొత్తానికా? అన్న నిర్ణయంపై ఆలిచిస్తున్నామని తెలిపారు. సామాజిక మాధ్యమాల ద్వారా సమాజంలో అలజడులు రేపితే ఊరుకోమని డీజీపీ హెచ్చరించారు. అలజడి రేపే వ్యాఖ్యలు చేసినవారిపై, వారిని ప్రోత్సహించిన వారిపైనా చర్యలు తీసుకుంటామన్నారు.కత్తి మహేశ్‌ చేసిన వ్యాఖ్యలను ఓ టీవీ ఛానెల్‌ పదేపదే ప్రసారం చేయడం మంచిది కాదని.. శాంతి భద్రతల పరిరక్షణలో కీలకంగా వ్యవహరించాల్సిన మీడియా ఇలాంటి విషయాల్లో సున్నితంగా వ్యవహరించాలని మందలించారు.
